Hapet ekspozita ‘Scrolling’ e Yll Xhaferit në Qendrën Informative dhe Kulturore të BE-së në Prishtinë

Artisti Yll Xhaferi ka hapur me datë 15 gusht ekspozitën e tij të radhës, në Qendrën Informative dhe Kulturore të Bashkimit Evropian në Prishtinë.

“Scrolling” erdhi si inspirimi i radhës i artistit të njohur nga Kosova. Nëntë ilustrime brenda ekspozitës të ftojnë drejt rrugëtimit nëpër një ëndërr me tulla ndërtimi, me burra e gra që marrin rreze dielli të mërzitshme dhe me hapësira gjelbrimi të cilat proporcionalisht janë më të vogla në hartat e qytetit të Prishtinës në krahasim me betonin e ndërtimet me leje a pa leje.

Ekspozitën e Xhaferit e shpalli të hapur Vjosa Berisha nga Qendra Informative dhe Kulturore e Bashkimit Evropian – EUICC në Prishtinë.

“Jemi të lumtur që po e nisim këtë seri të ekspozitave me ekspozitën e artistit Yll Xhaferi. Ylli është artist që ka marrë pjesë në shumë ekspozita dhe kjo është një vazhdimësi e punës së tij artistike. EUICC është hapësirë për artistët e rinj dhe ata të formuar të cilët në të ardhmen do të na sjellin punën e tyre dhe projektet e tyre artistike” tha Berisha në hapjen e ekspozitës.

Xhaferi është artist vizuel nga Prishtina. Ai ka diplomuar në Fakultetin e Arteve në Universitetin e Prishtinës dhe ka përfunduar studimet për master në drejtimin e Arteve Pamore. Xhaferi është fitues i çmimit Artistët e së Nesërmes nga Galeria Kombëtare në vitin 2012 dhe ka marrë pjesë në ekspozita të ndryshme të artit vizuel në qytet p.sh. Prishtina Mon Amour në Pallatin e Rinisë dhe Sportit, Livrit – (si pjesë e SURF, kuruar nga Erzen Shkololli, Bienale Meditterana, Milano dhe Tirana dhe ekspozita e tij personale e titulluar Toy Story në galerinë e artit Motrat.

Për ta vizituar ekspozitën ‘Scrolling’, ejani deri me datë 15 shtator në Qendrën Informative dhe Kulturore të Bashkimit Evropian në Prishtinë.