Korrik 9, 2018 | Monday
Fushata nga më të parat e BE-së si pjesë e asistencës së BE-së ndaj Kosovës zgjati gjashtë javë me organizimin e ngjarjeve të ndryshme edukative dhe kulturore në mbarë Kosovën.
Ambasadorja Nataliya Apostolova ritheksoi rëndësinë e arsimit cilësor në fjalën e saj përmbyllëse.
“Çdo ditë e humbur në adresimin e nevojës për cilësi është krim ndaj brezave të rinj dhe Bashkimi Evropian nuk do ta lejojë këtë. Është fakt i njohur se për një kohë të gjatë arsimi në gjuhën shqipe ishte i ndaluar në Kosovë, por tash është koha për brezat e rinj që të jenë në nivel të njëjtë me moshatarët e tyre nëpër shoqëritë evropiane. Mu për këtë arsye, BE e ka caktuar arsimin si fushë prioritare të punës në Kosovë”, tha Apostolova.
Ceremonia përmbyllëse e Fushatës për Arsim Cilësor është mbajtur në Qendrën Burimore – Përparimi.
Nxënësit nga Përparimi performuan një shfaqje të cilën e kishin përgatitur me mësimdhënësit e tyre enkas për këtë takim.
Janë organizuar ligjërata universitare dhe debate në qytetet kryesore të Kosovës gjatë kësaj Fushate, përderisa fushata “BE, një ditë mësim” solli ambasadorët e vendeve anëtare të BE-së më afër publikut për të biseduar për rrugën evropiane dhe praktikat evropiane të arsimit dhe mësimdhënies.
Fushata është zbatuar nga EUICC – Qendra Informative dhe Kulturore e Bashkimit Evropian.