Gusht 7, 2018 | Tuesday
Me 17 korrik, këta praktikantë janë takuar me disa gazetarë nga medie të ndryshme në Kosovë, kësisoj duke shkëmbyer përvojat e tyre dhe duke biseduar rreth çështjeve me rëndësi për ta.
Eraldin Fazliu nga Kosovo 2.0, Fitim Gashi nga Koha Ditore, Plator Gashi nga Prishtina Insight, Arlinda Kqiku nga Zëri dhe Arbër Selmani nga KultPlus mirëpritën në EUICC – Qendrën Kulturore dhe Informative të Bashkimit Evropian në Prishtinë mysafirët nga Brukseli për një bashkëbisedim në tema të ndryshme: nga procesi i liberalizimit të vizave e deri te të drejtat e komuniteteve të ndryshme në Kosovë.
Gjatë takimit, gazetarët nga Kosova folën për procesin e liberalizimit të vizave duke potencuar prapë rëndësinë e lëvizjes së lirë të qytetarëve të Kosovës për udhëtim në Evropë. Edhe në cilësinë e gazetarit, shumë prej tyre kanë hasur në burokraci kur kanë aplikuar për vizë Schengen dhe shumë herë procesi i dorëzimit të dokumenteve ka marrë shumë kohë dhe mundim.
Praktikantët nga Brukseli kanë ndarë përvojën e tyre në punën me institucionet e larta në Bruksel dhe kanë siguruar gazetarët kosovarë se e ardhmja e Bashkimit Evropian është ajo me një proces zgjerimi.
Në mesin e diskutimeve ishte edhe diskutimi i lirisë së shtypit, ku gazetarët nga Kosova u pajtuan se Kosova qëndron pak më mirë se shtetet tjera në Ballkan, në këtë fushë. Në Indeksin e Lirisë së Shtypit – 2018 World Press Freedom Index, Kosova u radhit e 78-ta nga 180 shtete, duke përmirësuar këtë pozitë për katër vende prej vitit të kaluar (82).
Një diskutim interesant pasoi rreth RTK – Radio Televizionit të Kosovës dhe mendimit që audienca në përgjithësi ka për këtë televizion.
Gjatë vizitës së tyre në Kosovë, praktikantët nga Brukseli u takuan edhe me Ministren e Integrimit Evropian – Dhurata Hoxha, përfaqësuesit e OSCE-së, përfaqësuesit e Zyrës së Bashkimit Evropian në Kosovë dhe përfaqësuesit e Këshillit të Evropës në Kosovës.