Gusht 23, 2021 | Monday
Shtëpia e Evropës në Mitrovicën e Veriut sot hapi dyert për ekspozitën më të re të artit të titulluar “Ekspozita e Skulpturave dhe Vizatimeve” të artistit të ri Aleksandar Glibetiq Pibo. Veprat e artit të artistit të talentuar Aleksandar Glibetiq Pibo, ekspozohen në ambientet e Shtëpisë së Evropës dhe artdashësit mund të vizitojnë ekspozitën duke filluar nga sot dhe deri më 21 shtator, duke iu përmbajtur rreptësishtë rregullave të COVID-19.
Ekspozita përfshin dy lloje të ndryshme të veprave të artit, përkatësisht vizatime të stileve të ndryshme dhe skulptura të krijuara prej mermeri. Në hapjen e ekspozitës, artdashësit patën rastin të njihen nga afër me veprat e artit të Glibetiq, veçanërisht skulpturat dhe vizatimet. Glibetiq, një artist i ri i talentuar, është i njohur kryesisht për stilin e tij novator në skulpturë, si dhe në artin e rrugës dhe forma të tjera të arteve të bukura. Kjo ishte ekspozita e tij e pestë personale, ndërsa ai gjithashtu ka marrë pjesë në shumë ekspozita të tjera dhe aktivitete artistike.
Gjatë hapjes, Aleksandar Glibetiq tha: “Do të doja të falënderoja Shtëpinë e Evropës në Kosovë për mundësinë për të ekspozuar veprat e mia këtu. Jam shumë i lumtur për mundësinë që puna ime të shijohet nga artdashësit dhe entuziastët e artit dhe shpresoj që shumë do të vijnë dhe do t’i shohin ato gjatë një muaji për sa ekspozita do të jetë e hapur.”
Ekspozita, e cila organizohet nga Shtëpia e Evropës në Kosovë dhe mbështetet nga zyra e Bashkimit Evropian në Kosovë, do të qëndrojë e hapur deri më 20 shtator, dhe mund të vizitohet çdo ditë pune nga ora 9:00-18:00 në Shtëpinë e Evropës në Mitrovicën e Veriut.