Dhjetor 12, 2018 | Wednesday
Ngjarja përfundimtare e Fushatës për Mjedisin #JepiMundësiGjelbërimit në Kosovë ishte ‘Kafja e Gjelbër për Mjedisin’
Kësisoj, për të shënuar fundin e një Fushate mjaft të suksesshme dhe aktive e cila nisi në shtatorin e vitit 2018-të në Kosovë, organizuar nga Zyra Informative dhe Kulturore e Bashkimit Evropian në Kosovë, me datë 6 dhjetor u organizua një diskutim në mes të Riccardo Serri – Kryesues i Sektorit Politik, Ekonomik dhe Integrim Evropian në Zyrën e Bashkimit Evropian në Kosovë, përfaqësuesve të tjerë nga Bashkimit Evropian, organizatave të shoqërisë civile, ekspertëve dhe studentëve, në ambientet e Qendrës Informative dhe Kulturore të Bashkimit Evropian – EUICC në Prishtinë.
Diskutimi u fokusua në hapat e ardhshëm dhe rekomandimet se si duhet mobilizuar qytetaria aktive në Kosovë kur vjen puna tek mbrojtja e mjedisit dhe ambientit.
Riccardo Serri tregoi se fundi i kësaj Fushate për Mjedis në Kosovë vetëm sa e risjellë rëndësinë e mjedisit në jetën e secilit qytetar.
“Ky është momenti final i kësaj Fushate, një tentim tjetër për të luftuar në kauzën e mjedisit. E kemi nisur misionin tonë me arsimimin, në fillimin e vitit 2018-të, dhe tash kemi një Fushatë për Mjedisin. Kjo Fushatë ka qenë vetëm vazhdimësi e angazhimit tonë në fushën e mjedisit” tha Serri gjatë këtij diskutimit frytdhënës.
Miran Vatovec nga Zyra e Bashkimit Evropian në Kosovë tregoi se ka negociata dhe bisedime të frytshme me organizatat e ndryshme në Kosovë për të përmirësuar gjendjen e mjedisit. Megjithatë, sipas tij, fuqinë për të bërë ndryshime më të mëdha e kanë pikërisht këto organizata që punojnë në Kosovë dhe e njohin gjendjen më mirë dhe më nga afër.
Me anë të këtij diskutimi, Zyra e Bashkimit Evropian në Kosovë pranoi edhe rekomandime substanciale për të vazhduar angazhimin e fuqishëm në fushën e mjedisit.
Gazmend Selimi nga Zyra e Bashkimit Evropian në Kosovë pohoi se Bashkimi Evropian mbetet donatori më i madh në Kosovë kur flitet për mjedisin, duke krijuar projekte por duke ndihmuar edhe në infrastrukturën institucionale. Uji i pijshëm, sistemi i mbeturinave dhe sistemi energjetik janë vetëm disa prej komponenteve ky BE ka kontribuuar sistematikisht.
Lum Zhaveli, një notar i shkëlqyer dhe një prej katër kampionëve të Fushatës për Mjedis, gjatë diskutimit tregoi se ai e merr vullnetarizmin shumë për zemër dhe se të qenit pjesë e kësaj Fushate për të ishte privilegj dhe mundësi për të ndihmuar në fushën e mbrojtjes së ambientit.
“Ne jemi njerëz me zemër të mirë por na mungon kultura e vullnetarizmit, e unë mendoj se ajo duhet të jetë më e pranishme në jetën tonë. Kauza e kësaj Fushate është shumë humane, sepse unë mendoj se mjedisi luan rol shumë të rëndësishëm dhe primar në jetën e secilit” tregon Zhaveli.
Learta Hollaj nga INDEP – Instituti për Politika Zhvillimore, përmendi faktin se para pesë vitesh njerëzit kishin skepticizmin e tyre mbi energjinë efiçiente ndërsa sot janë krijuar ligje dhe po planifikohet edhe një Fond për Energjinë Efiçiente, pra gjërat kanë ecur tutje dhe kanë përparuar.
Gjatë diskutimit folën edhe Rinora Gojani nga Balkan Green Foundation, pulmologu Skender Baca dhe Fatos Lajqi nga ERA – Environmental Responsible Action.
Fushata për Mjedisin u implementua nga Qendra Informative dhe Kulturore e Bashkimit Evropian, me panele diskutimi, me aktivitete në rrugë, me gara të ndryshme dhe me mundësi përfitimi nga organizatat e fushës. Katër komponentet ku kjo Fushatë u fokusua ishin uji i pastër, ajri i pastër, menaxhimi i mbeturinave dhe energjia efiçiente.