Ndotja dhe ndryshimet klimatike janë një nga kërcënimet kryesore me të cilat po ballafaqohet planeti Tokë sot. Zgjidhjet po kërkohen dhe ofrohen në një sërë fushash, duke përfshirë modën, dizajnin e qëndrueshëm, ekonominë qarkore dhe të tjera.

Një nga ndërmarrjet që po kontribuon në mënyrë aktive në zvogëlimin e mbeturinave në Kosovë është DYVO. Për të promovuar punën e tyre dhe për të rritur ndërgjegjësimin për metodat alternative dhe novatore të trajtimit të ndryshimeve klimatike, Shtëpia e Evropës në Mitrovicën e Veriut hapi dyert për ekspozitën “Ridizajnim dhe Riciklim në industrinë e modës”. Ekspozita shfaq artikujt e modës të krijuar nga ndërmarrja shoqërore DYVO.

DYVO, një ndërmarrje shoqërore që vepron në Prishtinë, mbeturinat në formë të plastikës akrilike i merr dhe i rikrijon në artikuj modernë, trendë dhe të qëndrueshëm mode. Përveç artikujve të modës që krijojnë, ata gjithashtu përpiqen të rrisin ndërgjegjësimin përmes aktiviteteve të ndryshme siç janë punëtoritë dhe aktivitetet e ngjashme.

Produktet e DYVO të ekspozuara në ekspozitën “Ridizajnimi dhe Riciklimi në industrinë e modës” mund të vizitohen çdo ditë pune, në Shtëpinë e Evropës në Mitrovicën e Veriut, nga ora 9:00 – 18:00. Ekspozita organizohet nga Shtëpia e Evropës në Kosovë dhe mbështetet nga Zyra e Bashkimit Evropian në Kosovë.