‘EU gender talks’ fillon me debat dhe me ekspozitë me personat me nevoja të veçanta

Biseda e parë në kuadër të një serie të debateve me titull ‘EU Gender Talks’ u mbajt me 21 janar në Qendrën Informative dhe Kulturore të Bashkimit Evropian në Prishtinë.

Këto biseda do t`iu japin mundësi njerëzve që përfaqësojnë grupe të ndryshme në Kosovë të flasin për çështje që lidhen me gjininë. Sesionet do të përfshijnë temat si: gratë në politikëbërje dhe marrje të vendimeve, përfaqësimi politik në zgedhje, arritje e barazisë gjinore me anë të arsimit cilësor dhe qasja në drejtësi.

Me temën “Gjinia dhe njerëzit më nevoja të veçanta”, biseda e parë bëri bashkë Ambasadoren e Bashkimit Evropian në Kosovë/Përfaqësuesen Speciale Nataliya Apostolova dhe Elvana Shalën – Ambasadore e Vullnetit të Mirë për Kosovë, para një audience e cila provoi të gjente zgjidhje për problemet e ndryshme me të cilat ballafaqohen çdo ditë ky grup i njerëzve.

Apostolova tregoi se gratë me nevoja të veçanta në Kosovë ballafaqohen me diskriminim të dyfishtë dhe e gjejnë veten para shumë sfidave, dhe kjo dukuri duhet të shqyrtohet në mënyrë institucionale.

“E drejta e njerëzve me nevoja të veçanta në Kosovë, sikur çdo e drejtë tjetër në Kosovë, vuan nga e njëjta sëmundje: edhepse legjislacioni është vënë në funksion, implementimi i tyre mbetet sfidë, madje edhe në aspektin financiar. Njerëzit me nevoja të veçanta ballafaqohen çdo ditë me diskriminim, mospërfshirje, paragjykime, probleme me sistemin e arsimit, probleme me qasje në hapësira publike dhe në tregun e punës, sa për ti përmendur disa prej vështirësive. Megjithatë, çka ata duan është pranim, të drejta të barabarta dhe mundësi” tha në këtë ngjarje Apostolova.

Elvana Shala, edhe vetë pjesë e komunitetit të personave me nevoja të veçanta, gjatë debatit solli në vëmendje faktin se edhe vetë ka pasur paragjykime nga të tjerët deri në rrugën e saj për tu bërë Ambasadore e Vullnetit të Mirë, pasi ka pasur qasje të kufizuar në disa institucione të Kosovës. Megjithatë ajo nuk është dorëzuar asnjëherë.

Gjatë debatit, Ombudspersoni Hilmi Jashari dhe Habit Hajredini nga Zyra për Qeverisje të Mirë pranë Kryeministrisë së Kosovës, u bashkuan me fjalimet e tyre duke ofruar të dhëna se si institucionet po i ndihmojnë personave me nevoja të veçanta.

Pas debatit, Ambasadorja Apostolova zyrtarisht e shpalli të hapur ekspozitën ‘E bukura fillon me ne’ me fotografi nga revyja e modës me persona me nevoja të veçanta e cila u mbajt në majin dhjetor 2018 në Prishtinë.

Eloida Alija është një prej bukurosheve simpatike që është përfshirë në ekspozitë, e lumtur për këtë fakt.